Hlutverk grunnskóla

I hluti. Stefna og sýn Hrafnagilsskóla

Stefna Hrafnagilsskóla

Hrafnagilsskóli hefur það hlutverk að veita menntun á grunnskólastigi eins og hún gerist best á hverjum tíma, að virðing og vingjarnleiki einkenni öll samskipti og að rækta manngildi og dyggðir.

Dyggðir

Skólastarfið hvílir á virðingu fyrir öllum, ábyrgri hegðun, umhyggju og vingjarnleika í samskiptum. Kjarnadyggðir eru: Góðvild, ábyrgð og virðing.

Að gera allt framúrskarandi vel

Umbótamiðuð vinnubrögð einkenna öll störf og unnið er samkvæmt skriflegum áætlunum.

Fagmennska

Hrafnagilsskóli vinnur markvisst að því samkvæmt yfirlýstum aðferðum að hver nemandi fái kennslu við hæfi, að rekstur sé hagkvæmur og innan heimilda og að stjórnun skólans grundvallist á gegnsæjum starfsháttum.

Skilningur

Skilningur er grundvallarviðhorf í skólasamfélaginu með það að leiðarljósi að allir hafi hið góða í sér og möguleikann til að verða betri manneskjur.

Framtíðarsýn

Hrafnagilsskóli vill hafa farsæl mótandi áhrif á samfélagið og að litið verði með trausti til alls þess sem þar er gert. Nám og kennsla er þungamiðja skólastarfs og því mikilvægt að fagfólk komi að öllum störfum. Það er metnaðarmál Hrafnagilsskóla að nemendur fái góða menntun, að skólinn sé eftirsóknarverður vinnustaður og að hann sé þekktur fyrir fagmennsku, áreiðanleika og árangur.

Kennslu- og uppeldisfræðileg stefna

Skólamenning Hrafnagilsskóla einkennist af vilja stjórnenda, kennara og annarra starfsmanna til að nemendur nái góðum námsárangri.

Námið byggir á árangursviðmiðum, vandaðri áætlanagerð, vali á námsefni, kennsluaðferðum og námsmati sem styður nemendur í að ná hæfniviðmiðum.

Stjórnendur leiða starfsþróun í kennslu á grundvelli fimm meginþátta í starfi kennarans: persónulegum eiginleikum, fagþekkingu, áætlanagerð og undirbúningi, kennslu og bekkjarstjórnun og námsmati.

Vingjarnleiki, ábyrg hegðun og virðing einkenna samskipti í skólanum.

Forsenda alls náms er vellíðan og það er frumhlutverk grunnskóla að skapa starfsanda sem laðar hana fram. Það er yfirlýstur vilji starfsfólks Hrafnagilsskóla að ná því marki með því fyrst og fremst að:

• koma fram við nemendur af virðingu og góðvild,
• höfða til ábyrgðar nemenda á eigin námi og hegðun,
• laga nám að þörfum nemenda,
• sem flest í skólastarfinu sé fyrirsjáanlegt,
• taka mið af áhugasviði nemenda og skapa nemendum öruggt starfsumhverfi.

Til að efla með nemendum sjálfstraust, auka máttarkennd og skapa frjóar námsaðstæður þarf einkum tvennt að fara saman. Annars vegar þurfa verkefnin að vera hæfilega krefjandi og hins vegar að þau séu áhugavekjandi með viðeigandi hvatningu og leiðsagnarmati. Námsefni og kennsluaðferðir eru valdar með hliðsjón af Aðalnámskrá grunnskóla.

Grunnþættir menntunar

Sú menntastefna sem birtist í Aðalnámskrá grunnskóla árið 2011 er reist á sex grunnþáttum menntunar sem eru leiðarljós við námskrárgerðina. Grunnþættirnir eru: Læsi, sjálfbærni, heilbrigði og velferð, lýðræði og mannréttindi, jafnrétti og sköpun. Grunnþættirnir snúast um læsi á samfélag, menningu, umhverfi og náttúru þannig að börn og ungmenni læri að byggja sig upp andlega og líkamlega, að bjarga sér í samfélaginu og vinna með öðrum (Aðalnámskrá grunnskóla, 2011).

Læsi

Læsi höfðar til þess að hver einstaklingur hafi hæfni til að skynja og skilja umhverfi sitt og samfélag á gagnrýninn hátt og taka þátt í að móta það. Meginmarkmið læsis er að nemendur séu virkir þátttakendur í að skapa eigin merkingu og bregðast á persónulegan og skapandi hátt við því sem þeir heyra og lesa með hjálp þeirra miðla og tækni sem völ er á.

Birting læsis í skólastarfinu

• Unnið er eftir lestrarstefnu skólans (er í endurskoðun).
• Læsi í víðum skilningi felur í sér að vera læs á menningu sína, félagsleg samskipti og umhverfi.
• Læsi gengur í gegnum allar námsgreinar allra árganga. Það tekur til kennslu og þjálfunar í lestri og lesskilningi, tjáningar og samskipta, ritunar, eflingar orðaforða, notkunar ýmissa miðla og stafrænnar tækni.
• Áhersla er lögð á ígrundun, gagnrýna hugsun og miðlun efnis.
• Í lestrarkennslu er áhersla lögð á: Lestur, skrift, orð, málnotkun, málsamfélag, bækur, blöð, ritföng, tölvur, umræður, orðanotkun, myndmál, stafrænt læsi, miðlamennt, miðlalæsi, ljósmyndir, prentað mál, tónlist og merkingarsköpun.

Dæmi um leiðir til læsis

• Kennt er eftir lestrarstefnunni Byrjendalæsi.
• Áhersla á les- og hlustunarskilning.
• Yndislestur.
• Bókasafn.
• Tölvur og snjalltæki.
• Fjölbreyttir kennsluhættir.
• Stóra upplestrarkeppnin.
• Lesstundir nemenda 7. bekkjar í leikskóla.
• Tónmenntakennsla.
• List- og verkgreinakennsla.
• Samverustundir.
• Dagur íslenskrar tungu.
• Ýmis afmörkuð verkefni tengd læsi s.s. dagbókarskrif og lestrarátök.
• Dagleg lestrarþjálfun í skóla og heima.

Sjálfbærni

Menntun til sjálfbærni miðar að því að gera fólki kleift að takast á við viðfangsefni sem lúta að samspili umhverfis, félagslegra þátta og efnahags í þróun samfélags. Algengasti skilningur á hugtökunum sjálfbærni og sjálfbær þróun felur í sér að við skilum umhverfinu til næstu kynslóðar í ekki lakara ástandi en við tókum við því.

Birtingarmynd sjálfbærnimenntunar

• Hrafnagilsskóli vinnur eftir sjónarmiðum umhverfisverndar eins og hægt er hverju sinni.
• Reynt er eftir fremsta megni að endurnýta hluti og endurvinna. Lögð er áhersla á að nýta vel allan pappír. Sorp er flokkað og lögð er áhersla á umbúðalaust nesti. Lífrænn úrgangur er nýttur til moltugerðar.
• Hvatt er til hófsemi t.d. með því að borða þann mat sem nemendur skammta sér og endurnýta hluti sem mest.
• Nemendur vinna verkefni sem tengjast sjálfbærni t.d. að vigta matarafganga, gera áætlun um hvernig megi minnka sorpið o.fl.
• Á samverustundum og í gæðahringjum eru ýmis mál rædd og nemendur fá tækifæri til að koma á framfæri skoðunum sínum.
• Í námsgreinum eins og náttúrufræði, samfélagsfræði, umhverfismennt og heimilisfræði fer fram fræðsla, verkefni og umræður um ýmislegt tengt sjálfbærni.
• Skólinn hefur aðgang að útikennsluvæði í Aldísarlundi sem er skógarlundur í nágrenni hans.
• Nemendum í 6. bekk er boðið í siglingu með skipinu Húna II.
• Umhverfismennt er á stundaskrá yngsta stigs og miðstigs og farið er reglulega í göngu- og vettvangsferðir.

Heilbrigði og velferð

Heilbrigði byggist á andlegri, líkamlegri og félagslegri vellíðan. Í öllu skólastarfi þarf að huga að því að efla heilbrigði og stuðla markvisst að velferð og vellíðan.

Birtingamynd heilbrigðis og velferðar

• Iðjuþjálfi fylgir eftir hreyfiþjálfun hjá nemendum í 1. bekk.
• Á yngsta stigi er umhverfismennt á stundaskrá í hverri viku.
• Nemendur fá íþrótta-, dans- og sundkennslu allt skólaárið.
• Fastir útivistardagar eru á skólaárinu.
• Á yngsta stigi er lögð áhersla á aukna hreyfingu með viðbótartíma (tómstundahringekja).
• Hreyfistöðvar um skólann: klifurveggur, gólfspil, upphífingarstangir.
• Lögð er áhersla á umbúðalaust nesti.
• Í mötuneyti er ávallt boðið upp á ferskt grænmeti.
• Regluleg úttekt er gerð á næringarinnihaldi matarins.
• Nemendur fá fræðslu um hollustu, hreyfingu, kynheilbrigði og tannheilsu.
• Kannanir um vellíðan og svefn eru lagðar reglulega fyrir nemendur.
• Dyggðakennsla: ábyrgð, góðvild og virðing.
• Nemendur þjálfast í samskiptafærni og gagnrýnni hugsun m.a. með Jákvæðum aga.

Leiðir til heilbrigðis og velferðar

• Eineltisáætlun skólans.
• Forvarnaáætlun.
• Rýmingaráætlun í öllum kennslustofum.
• Agastefnan, Jákvæður agi.
• Þjálfun í anda hugarfars vaxtar (growth mindset) og Hugarfrelsis.
• Íþróttahús og sundlaug.
• Mötuneyti skólans.
• Skólahjúkrunarfræðingur, iðjuþjálfi.
• Stoðkerfi skólans: nemendaverndarráð og skólasálfræðingur.
• Tengiliður farsældar.
• Útivistardagar og umhverfismennt.
• Útikennslustofa í Aldísarlundi.

Lýðræði og mannréttindi

Í lýðræði taka einstaklingar afstöðu til siðferðilegra álitamála og virkan þátt í mótun samfélagsins. Forsenda lýðræðis er samábyrgð, meðvitund og virkni.

Birtingarmynd lýðræðismenntunar

• Dyggðirnar ábyrgð, virðingu og góðvild eru grunngildi að mannréttindum og samskiptum.
• Kynning á Barnasáttmála Sameinuðu þjóðanna.
• Nemendur koma sér saman um bekkjarreglur og bekkjarsáttmála.
• Störf í bekkjum skiptast nemendur á að inna af hendi.
• Bekkjardeild velur mat með lýðræðislegri kosningu.
• Gæðahringir þar sem ágreiningur er leystur og skoðanir koma fram.
• Nemendur sitja í nefndum og ráðum: nemendaráði, ungmennaráði, félagsmiðstöðvaráði og skólaráði.
• Nemendur velja oft á milli verkefna. Valgreinar í 8.–10. bekk.
• Jákvæður agi efla gagnrýna hugsun og umhyggju.

Jafnrétti

Markmið jafnréttismenntunar er að skapa tækifæri fyrir alla til að þroskast á eigin forsendum. Jafnrétti er regnhlífarhugtak sem nær til margra þátta t.d. aldurs, búsetu, fötlunar, kyns, kynhneigðar, litarháttar, lífsskoðana, menningar, stéttar, trúarbragða, tungumáls, ætternis og þjóðernis.

Birtingarmynd jafnréttismenntunar

• Skýr skólastefna sem byggir á virðingu, ábyrgri hegðun, umhyggju og vingjarnleika.
• Tækifæri til að ræða fjölbreytileika, fordóma o.fl. í samverustundum og gæðahringjum.
• Fræðsla um kyn og kynhneigð eftir aldri og þroska.
• Trúarbragðakennsla, mismunandi menning og lífsskoðanir.
• Aldursblandað starf á þemadögum.
• Fjölbreyttar kennsluaðferðir og námsmat.

Sköpun

Sköpun byggist á gagnrýninni hugsun og aðferðum sem opna sífellt nýja möguleika. Sköpun er að uppgötva, njóta, virkja ímyndunaraflið og leika sér með möguleika.

Birtingarmynd sköpunar

• Fjölbreyttar kennsluaðferðir og list- og verkgreinar sem fastir liðir.
• Reglulega brotið upp hefðbundið skólastarf með aldursblönduðum hópum.
• Gæðahringir á stundarskrá hverrar bekkjardeildar.
• Leikir, hópastarf, útikennsla, tilraunir og rannsóknarvinna.
• Samverustundir þar sem nemendur sýna og segja frá verkum sínum.
• Verk nemenda sýnileg á veggjum og vef.
• Aldísarlundur nýttur á margvíslegan hátt.

Leiðir til sköpunarstarfs

• Skapandi skólastarf á hverjum degi.
• Hátíð á Degi íslenskrar tungu 16. nóvember.
• Jólaskemmtun.
• Árshátíðir á hverju aldursstigi.
• Kennsla í list- og verkgreinum.
• Tónmenntakennsla, forskóli og danskennsla.
• Samvinna við Tónlistarskóla Eyjafjarðar og leikskólann Krummakot.

Starfsemi skólans frá stofnun hans

Skráð af Sigurði Aðalgeirssyni með viðbótum frá Karli Frímannssyni.

Haustið 1971 hófst skólahald í Hrafnagilsskóla en skólinn var heimavistarskóli fyrir 4 sveitarfélög (Svalbarðsstrandarhrepp, Öngulsstaðahrepp, Saurbæjarhrepp og Hrafnagilshrepp). Þetta fyrsta starfsár stunduðu nám í skólanum nemendur í 1. og 2. bekk gagnfræðastigs, alls 64.

• 1972 – Kennsla flutt í nýtt kennsluhúsnæði. Skólinn vígður 3. desember.
• 1973 – Fyrst tekið landspróf, árið eftir gagnfræðapróf.
• 1980 – Ný sundlaug, 11 x 25 m, tekin í notkun.
• 1989 – Rekstri heimavistar hætt. Nýtt íþróttahús tekið í notkun.
• 1991 – Sveitarfélögin þrjú sameinuð undir nafninu Eyjafjarðarsveit.
• 1992 – Allt skólahald sameinað undir eina stjórn á Hrafnagili.
• 2000 – Sérdeild stofnuð fyrir stúlkur frá meðferðarheimilinu á Laugalandi.
• 2001 – Viðbygging reist við suðurenda skólans.
• 2007 – Ný sundlaug vígð 13. janúar. Skólinn hlaut Íslensku menntaverðlaunin.
• 2021 – Fyrsta skóflustunga tekin að viðbyggingu 19. september.

Nemendafjöldi

Stjórnskipulag skólans

Skólanefnd Eyjafjarðarsveitar

Skólanefnd Eyjafjarðarsveitar fer með málefni Hrafnagilsskóla. Í nefndinni sitja fimm aðalfulltrúar skipaðir af sveitarstjórn.

Skólastjórar

Í skólanum er skólastjóri og aðstoðarskólastjóri.

Skólaráð

Skólaráð er samráðsvettvangur skólastjóra og skólasamfélagsins. Skipað 9 fulltrúum:

• 2 fulltrúar nemenda
• 2 fulltrúar foreldra
• 2 fulltrúar kennara
• 1 fulltrúi annarra starfsmanna
• Fulltrúi úr grenndarsamfélaginu
• Skólastjóri

Stigstjórn

Kennarahópnum er skipt í 4 stig: Yngsta stig (1.–4. bekkur), miðstig (5.–7. bekkur), unglingastig (8.–10. bekkur) og list- og verkgreinar. Stigstjóri er yfir hverju stigi.

II hluti. Innra starf skólans

Foreldrasamstarf

Menntun og uppeldi er samvinnuverkefni skóla og heimila. Sameiginleg verksvið geta m.a. falist í:

• Námsstuðningi.
• Að rækta farsæla mannkosti svo sem ábyrga hegðun, virðingu og vingjarnleika.
• Að efla skilning á mikilvægi menntunar og skólastarfi.
• Að vera hvetjandi.
• Að vera leiðandi í uppeldi – meðalvegurinn milli ofríkis og afskiptaleysis.
• Að skapa vettvang fyrir foreldra til að kynnast og samræma reglur og gildi.

Heimanám

Heimanám er mikilvægt og er lögð áhersla á að foreldrar beri ábyrgð á heimanámi barna sinna. Lestrarnám er undirstaða alls annars náms. Tilgangur heimanáms getur verið:

• Undirbúningur náms fyrir næsta tíma.
• Að stuðla að ákveðnum vinnuvenjum og sjálfsaga.
• Að undirstrika ábyrgð nemenda á námi sínu.
• Að gefa foreldrum tækifæri til að fylgjast með námi barna sinna.
• Að veita nemendum tækifæri til að festa í sessi og æfa það sem lært hefur verið.
• Þjálfun á mikilvægri færni.
• Tengja heimili og skóla.

Kennsluúrræði

Sérkennari og stoðkennari, í samvinnu við aðra kennara, hafa umsjón með gerð einstaklingsáætlana fyrir nemendur með sérþarfir.

Kennsla nemenda með annað móðurmál

Nemendur sem hafa annað móðurmál en íslensku eiga rétt á sérstakri kennslu í íslensku. Við skólann starfar ÍSAT kennari (íslenska sem annað tungumál) í 20% starfi. Skólinn útvegar kennslu í sænsku og norsku fyrir nemendur í 7. bekk og eldri.

Sérfræðiþjónusta

Í gildi er samningur Eyjafjarðarsveitar við Akureyrarbæ um þjónustu og ráðgjöf. Einnig er samstarf um barnaverndarmál.

Nemendaverndarráð

Nemendaverndarráð fundar einu sinni í mánuði. Í ráðinu sitja skólastjórar, hjúkrunarfræðingur, sérkennari og stoðkennari.

Valgreinar nemenda í 8.–10. bekk

Nemendur í 8., 9. og 10. bekk velja sér 3 valgreinar, samtals 6 kennslustundir á viku. Einnig geta þeir valið tónlistarnám eða skipulagða íþróttaþjálfun í stað einnar valgreinar.

Námsmat

Námsmat er óaðskiljanlegur hluti náms og kennslu. Meta skal hæfni, þekkingu, framkomu, vinnubrögð, framfarir, frumkvæði og samvinnu.

Framsetning námsmats

Matsviðmið

Matskvarðinn er skilgreindur sem sex einkunnir: A, B+, B, C+, C og D. Nemandi sem fær B, B+ eða A hefur náð hæfniviðmiðum í 10. bekk.

Próf og skimanir

Ítarlegar skimanir fara fram í öllum árgöngum, m.a.:

• 1. bekkur: Lesferill, stafakannanir, raddlestrarpróf. Viðmið: 20-55-75 orð/mín. í maí.
• 2. bekkur: Raddlestrarpróf, Aston Index. Viðmið: 40-85-100 orð/mín.
• 3. bekkur: Raddlestrarpróf, Orðarún, Aston Index. Viðmið: 55-100-120 orð/mín.
• 4. bekkur: Viðmið: 80-120-145 orð/mín.
• 5. bekkur: Viðmið: 90-140-160 orð/mín. Framsagnarpróf, LH 40.
• 6. bekkur: Viðmið: 105-155-175 orð/mín.
• 7. bekkur: Viðmið: 120-165-190 orð/mín.
• 8. bekkur: Viðmið: 130-180-210 orð/mín.
• 9. bekkur: Viðmið: 140-180-210 orð/mín.
• 10. bekkur: Viðmið: 145-180-210 orð/mín.

Vitnisburður

Vitnisburður um námsárangur á haustönn er á Mentor og kynntur í foreldraviðtölum í janúar. Vitnisburðarblað fyrir vorönn er afhent á skólaslitum.

Félagslíf og tómstundastarf

Allir bekkir

• Árshátíðir á hverju aldursstigi. Ágóði rennur í nemendasjóð.
• Dagur íslenskrar tungu.
• Sprengidagshátíð.

Yngsta stig

• Bekkjarsamkomur í samstarfi við foreldra.
• 4. bekkur fer í dagsferð á vordögum.

Miðstig

• Íþrótta- og leikjadagar.
• Bekkjarsamkomur.
• 7. bekkur fer í 5 daga dvöl í skólabúðunum að Reykjum í Hrútafirði.

Unglingastig

• Skólaferðalag í 10. bekk í maí.
• Bekkjarsamkomur.
• Félagslíf á vegum félagsmiðstöðvarinnar.

Skólaferðalag 10. bekkjar

Nemendur 10. bekkjar fara í skólaferðalag innanlands í maí. Kostnaður miðast við ferðasjóð. Afgangur rennur til góðgerðamála.

Vorferð 4. bekkjar

Nemendur í 4. bekk fara í dagsferð á vordögum. Ferðakostnaður greiddur af nemendasjóði.

Mötuneyti

Mötuneyti er rekið við Hrafnagilsskóla og fá nemendur í 1.–10. bekk hádegisverð alla virka daga. Áhersla er lögð á fjölbreytta fæðu rík af næringarefnum. Matseðlar eru birtir á heimasíðu skólans.

III hluti. Reglur, stefnur og áætlanir

Skólareglur

1. 1. grein: Skólareglum er ætlað að skapa starfsanda sem byggir á vellíðan, gagnkvæmri virðingu og samábyrgð allra. Þær eiga við á skólatíma, í skólahúsnæðinu, mötuneyti, á skólalóðinni, í skólabílum og á ferðum á vegum skólans.
2. 2. grein: Almenn umgengni skal einkennast af umburðarlyndi, kurteisi og snyrtimennsku. Jafnrétti og lýðræði skal haft að leiðarljósi.
3. 3. grein: Tilkynna ber forföll samdægurs. Leyfi í 1–2 daga er sótt til umsjónarkennara eða ritara. Lengri leyfi til skólastjóra.
4. 4. grein: Nemendur 1.–7. bekkjar eiga að fara út í frímínútum. Hjálmanotkun er skylt á hjóli, línuskautum og hlaupahjóli. Rafhlaupahjól mega koma en ekki nota á skólatíma.
5. 5. grein: Stuðla ber að heilbrigðum lífsháttum. Óheimilt: tyggjó, sælgæti, gosdrykki nema með leyfi. Vímuefni, rafrettur, nikótínpúðar, tóbak og áfengi eru með öllu óheimil. Farsímar eru óheimilir á skólatíma.
6. 6. grein: Nemendum ber að sinna heimanámi og hlýða fyrirmælum starfsfólks.
7. 7. grein: Skólinn tekur ekki ábyrgð á persónulegum munum. Tryggingar bæta skaða af vanrækslu skólans.
8. 8. grein: Umsjónarkennarar kynna nemendum og forráðamönnum skólareglur.
9. 9. grein: Gæta skal hófs við beitingu viðurlaga. Viðurlög skulu hvetja til bættrar hegðunar.
10. 10. grein: Starfsmönnum er óheimilt að neyta aflsmunar nema nauðsyn krefji.

Viðurlög við brotum á skólareglum

Fylgi nemandi ekki skólareglum skal reynt til þrautar að efla skilning hans. Ef það tekst ekki hafi umsjónarkennari samband við foreldri. Við ítrekuð brot boða skólastjórnendur til fundar með foreldrum. Ef ítrekuð brot eru alvarleg má vísa nemanda um stundarsakir úr skóla. Við ítrekuð brot er málum vísað til nemendaverndarráðs, sérfræðiþjónustu, barnaverndar eða skólanefndar.

Heilsugæsla – áætlun um fræðslu og skimanir

Heilsugæsla í skólum er framhald ung- og smábarnaverndar:

• 1. bekkur: Sjónpróf, hæðar- og þyngdarmæling, fræðsla um Líkaminn minn, hjálmafræðsla.
• 2. bekkur: Fræðsla um tilfinningar.
• 3. bekkur: Fræðsla um heilsuna (hollusta, hreinlæti, hugrekki, hreyfing og hvíld).
• 4. bekkur: Sjónpróf, hæðar- og þyngdarmæling, fræðsla um kvíða.
• 5. bekkur: Fræðsla um samskipti.
• 6. bekkur: Fræðsla um kynþroskann. Endurlífgun.
• 7. bekkur: Sjónpróf, hæðar- og þyngdarmæling. Bólusetningar gegn mislingum, hettusótt, rauðum hundum og HPV.
• 8. bekkur: Fræðsla um hugrekki og líkamsímynd.
• 9. bekkur: Sjónpróf, hæðar- og þyngdarmæling. Kynfræðsla, getnaðarvarnir, kynsjúkdómar. Bólusetning gegn mænusótt o.fl.
• 10. bekkur: Fræðsla um geðheilbrigði, kynheilbrigði, endurlífgun og ábyrgð á eigin heilsu.

Persónuverndarstefna

Hrafnagilsskóli hefur einsett sér að tryggja áreiðanleika, trúnað og öryggi persónuupplýsinga. Stefnan byggir á lögum nr. 90/2018 um persónuvernd og vinnslu persónuupplýsinga. Nánari upplýsingar á heimasíðu skólans.

Agamál og verklagsreglur

Jákvæður agi

Í Hrafnagilsskóla er unnið með uppeldisstefnu sem nefnist Jákvæður agi (Positive Discipline). Lögð er áhersla á:

• Gagnkvæm virðing í samskiptum bæði meðal barna og fullorðinna.
• Fyrirbyggja valdabaráttu.
• Góðvild og fasta þegar börnum eru sett mörk.
• Efla ábyrgð barna og kenna þeim að leita lausna.
• Hvatningu og hrós í stað umbunar.
• Byggja á styrkleikum barna.
• Bekkjarfundi til að kenna félagsfærni og lífsleikni.
• Skilja ástæður hegðunar í stað þess að einblína á afleiðingar.
• Auka samvinnu heimilis og skóla.

Ábyrgð og skyldur foreldra

Foreldrar skulu gæta hagsmuna barna sinna, hafa samráð við skólann, fylgjast með og styðja við skólagöngu barna sinna og stuðla að því að börnin mæti úthvíld og fylgi skólareglum.

Viðbrögð við óásættanlegri hegðun

Óásættanleg hegðun er t.d. brot á skólareglum, ekki farið að fyrirmælum, dónalegt orðbragð, ógnandi samskipti eða beiting ofbeldis. Kennari skráir atvikið og hefur samband við foreldra.

Forvarnaáætlun

Markmið

• Gera nemendur færa um að rækta persónuleg lífsgæði.
• Efla getu nemenda til að taka ábyrgð á eigin lífi.
• Fræða um skaðsemi vímuefna, tóbaks og koffíns.
• Styrkja líkamsvitund og ábyrgð á eigin líkama.
• Efla líkamlega, andlega og félagslega heilsu.
• Halda uppi fræðslu fyrir foreldra um heilbrigði.

Yfirlit um forvarnafræðslu

1.–4. bekkur

• Jákvæður agi, bekkjarsáttmálar, gæðahringir, hreyfing, söngur, dans.
• Umferðarfræðsla, endurskinsmerki frá Dalbjörgu.
• Einelti: umræður, sól á skólalóð, Jákvæður agi.
• Líkami og heilsa: fræðsla frá hjúkrunarfræðingi, tannverndarvika, Blátt áfram.
• Samhyggð: UNICEF-dagur.

5.–7. bekkur

• Jákvæður agi, ART þjálfun, samskiptanámskeið.
• Einelti: tengslakannanir, Skólapúlsinn.
• Líkami og heilsa: sjálfsmynd, kvíði, jákvæð netnotkun, kynfræðsla.
• Netöryggi og stafræn borgaravitund.

8.–10. bekkur

• Félagsmiðstöðin Hyldýpi: opið hús, ferðalög, andvökunótt.
• Einelti: Skólapúlsinn, tengslakannanir.
• Kynfræðsla og vímuefnafræðsla.
• Netöryggi og stafræn borgaravitund.

Áfallaáætlun

Markmið er að tryggja viðeigandi viðbrögð skólans við áföllum. Áfallateymi: skólastjóri, aðstoðarskólastjóri og hjúkrunarfræðingur.

Viðbrögð við áföllum

• Skólastjóri leitar staðfestingar.
• Áfallateymi kallað saman.
• Starfsmönnum og nemendum sagt frá.
• Upplýsingar sendar til heimila.
• Hlúð að nemendum og starfsfólki.

Eineltisáætlun

Það er yfirlýst í Hrafnagilsskóla að einelti er ekki liðið og leita skal allra leiða til að stöðva það.

Skilgreining á einelti

Vinnuferli í eineltismálum

1. Hver sem fær vitneskju/grun um einelti greinir umsjónarkennara eða skólastjórnanda frá málinu.
2. Byrjað er á að kanna málið og leitað upplýsinga.
3. Umsjónarkennari leitar upplýsinga frá þolanda, forráðamönnum og hugsanlegum gerendum.
4. Eineltisteymi myndað: skólastjórnandi, umsjónarkennari og iðjuþjálfi. Rætt við meinta gerendur og þolanda.
5. Áætlun um aðgerðir til að stöðva eineltið. Foreldrar upplýstir reglulega.
6. Beri aðgerðir ekki árangur er málinu vísað til nemendaverndarráðs.

Jafnréttisáætlun

Gerð í samræmi við lög um jafna stöðu og jafnan rétt kynjanna nr. 150/2020. Stefna Hrafnagilsskóla er að allir njóti jafns réttar án tillits til kyns.

Jafnréttisnefnd

Fjórir starfsmenn sitja í nefndinni. Hlutverk: fylgjast með jafnréttisáætlun, endurskoða framkvæmdaáætlun árlega.

Starfsfólk

Ekki skal mismuna á grundvelli kynferðis. Konum og körlum skal jafnt standa til boða starfsþjálfun og endurmenntun. Fylgjast skal með launum út frá kynjasjónarmiðum.

Nemendur

Þess skal gætt að nemendum sé ekki mismunað á grundvelli kynferðis. Nemendur fá fræðslu um kynferðislega áreitni og kynferðislegt ofbeldi.

Móttökuáætlun nemenda

Við móttöku nýrra nemenda er lögð áhersla á hlýjar móttökur og skýrar upplýsingar. Foreldrar og nemandi eru boðuð í kynningarheimsókn. Einum eða nokkrum nemendum er falið að fylgja nýjum nemanda fyrstu dagana.

Aldursblandað starf er á milli elsta árgangs leikskólans Krummakots og yngstu nemenda Hrafnagilsskóla til að auðvelda aðlögun.

Reception of students

When a new student starts at Hrafnagilsskoli the school makes sure to make them feel welcome and give them and their parents all the necessary information. Classmates are asked to act as guides during the first few days.

IV hluti. Mat á skólastarfi

Mat á árangri og gæðum

Mat á skólastarfi er liður í lögbundnu eftirlitsstarfi. Markmið er þríþætt:

1. Fylgjast með að starfsemi sé í samræmi við lög, reglugerðir og aðalnámskrá.
2. Auka gæði skólastarfsins og stuðla að umbótum.
3. Veita upplýsingar um skólastarfið, árangur þess og þróun.

Hrafnagilsskóli er með samning við Skólapúlsinn um árlegar viðhorfskannanir meðal nemenda, foreldra og starfsfólks.

Tilgangur innra mats

• Fyrir nemendur: Árangursríkara nám og betri líðan.
• Fyrir kennara: Meiri árangur í starfi og aukinn starfsþroski.
• Fyrir foreldra: Áreiðanlegri upplýsingagjöf og aukið traust.
• Fyrir skólastjórnendur: Leiðsögn um nauðsynleg skref í skólaþróun.

Nemendakönnun Skólapúlsins metur m.a.:

1. Ánægju og sjálfsmynd ungmenna.
2. Félagsanda.
3. Umræðuvettvang nemenda og kennara.
4. Ábyrgð og sjálfstæði nemenda.
5. Innri metnað og framtíðarsýn.
6. Skilvirkni kennslustunda.
7. Leiðandi uppeldi.